Bli kjent med Bok i bruk i barnehagen
Bok i bruk i barnehagen handlar om korleis biblioteket kan bidra til, og støtte opp om, tidleg start med lesing og ein aktiv lesekultur i barnehagen.
Når du har gått gjennom denne leksjonen, skal du i møte med barnehagetilsette kunne løfte litteraturen sin plass i barnehagekvardagen gjennom å:
-Bidra til å gjere litteraturen tilgjengeleg
-Formidle overfor barnehagetilsette korleis dei konkret kan ta bøkene i bruk
-Gjere ny litteratur kjent for barnehagetilsette
Slik når vi fleire barn og kan betre føresetnadane for at barna får jamlege møte med litteratur og bøker i kvardagen sin.
Barnehagen er ein viktig arena for møte mellom barn og bøker. For nokre barn kan det vere det første møtet med litteratur og høgtlesing. Å ha ein medviten kultur for lesing i barnehagen er derfor viktig.
I leksjonen legg vi til grunn at det er tre ting som må til for å utvikle ein lesekultur i barnehagen:
- tilgang på bøker
- jamleg leseaktivitet
- kjennskap til barnelitteratur
Bok i bruk i barnehagen bygger på erfaringar frå Lesefrø-prosjektet i Oslo i regi av Deichman bibliotek. Målet er å skape grobotn for ein medviten lesekultur i barnehagen som bidrar til leselyst, og som i tillegg stimulerer til god språkutvikling hos barna. Det er eit mål som krev innsats over tid.
I leksjonen får du presentert eit opplegg som er innretta med mål om å vidareformidle kunnskapen til barnehagetilsette. Mange bibliotek har gode samarbeid med barnehagar allereie, og mykje i leksjonen vil vere kjent. Prosjekt som Lesefrø har likevel vist at det eksisterer eit behov for å ikkje berre tilby bøker til barnehagar, men også å formidle korleis ta bøkene i bruk. Det er dei vaksne som er tett på barna i kvardagen og som særleg kan påverke kor ofte, korleis og kva slags bøker og leseaktivitetar barna får ta del i.
Virkar det?
Erfaringar frå Lesefrø-prosjektet viser at det fungerer å rette heilskapleg innsats mot barnehagane. Lesefrø-barnehagane har m.a.:
- Fått etablert ein lesekultur der bøker er ein integrert del av barnehagekvardagen
- Auka medvitet blant dei tilsette omkring samanhengen mellom leseaktivitet og språkstimulering
- Auka engasjement kring leseaktivitet blant barnehagetilsette og foreldre
- Større interesse for bøker og leseaktivitet blant barna
- Erfart at foreldre som ikkje har lese høgt med barna sine tidlegare har oppdaga gleda ved høgtlesing
Med sitt ekstra fokus på fleirspråklege barn viser resultata i tillegg at:
- barna sine ulike språk vert opplevd som ein positiv ressurs i barnehagen
- å snakke ulike språk gjev ei oppleving av fellesskap
Støttemateriell til leksjonen
I tilknyting til leksjonen er det utarbeidd fleire ressursar som på ulikt vis er meint som støtte i læringa.
- Eit arbeidsdokument (pdf) som kan nyttast i eige arbeid.
- Ein presentasjon [kjem snart] som du kan ta utgangspunkt i når du lagar eige materiell til barnehagane i din kommune.
- Ei samanfatting av det som står om lesing i barnehagens rammeplan, det sentrale styringsdokumentet som alle barnehagar er forplikta til å følgje.
- Tre filmar frå Hovinenga barnehage som viser ulike formidlingssituasjonar og som biblioteket kan gjenbruke i møte med barnehagar.