Ei planlagt lesestund i sju steg
I første del av leksjonen har vi henta inn ekspertise frå Agnes-Margrethe Bjorvand, førstelektor ved Universitetet i Agder, formidlar og forfattar. Med utgangspunkt i sju spørsmål gir ho oss ein god guide til kva som skal til for å planlegge og gjennomføre ei lesestund. Så enkelt kan det gjerast! Her er det smarte tips å ta med seg i planlegginga av eigen lesestund.
- Kven skal vi lese for?
Prøv å finne kven barna du skal halde lesestund for er. Tilnærminga til formidling kan vere forskjellige basert på storleiken på gruppe med barn. - Kvar skal vi lese?
Rommet styrer meir enn vi trur. Prøv å reduser potensielle forstyrringar. Heng opp stoff, lag ei lesehole, flytt på reolane dersom det er mogleg for å skape eit lukka rom, eit rom som skapar forventningar til gode lesestunder. - Kva skal vi lese?
Vel bok med utgangspunkt i bøker du sjølv likar. Bøker med tydeleg barneperspektiv slik at barn kan kjenne seg igjen i hovudperson eller tema. - Korleis kan vi førebu oss på å lese boka vi har valt? Lag ein plan for korleis du vil gi liv til høgtlesinga. Det er viktig å ha god kontakt med barna, vise bilde samstundes som du les. Derfor må du kjenne boka du skal lese, slik at du sjølv veit kor du kan leggje inn ei pause, og heve og senke stemma.
- Korleis innleie ei lesestund? Ei roleg innleiing skapar forventningar. Møt barna roleg, med låg stemme. Bruk området der du held lesestunda som eit reiskap for å invitere barna inn i ei eiga verd, og vent til alle har roa seg.
Skap ytterlegare forventningar ved hjelp av fysiske reiskapar som ei skattkiste, eller andre rekvisittar som kan introdusere boka de skal lese.
Husk: Målet med lesestunda er at barna får ei god oppleving, ikkje sett fokus på å komme i gang og bli ferdig med boka, men les roleg nok til at alle har moglegheit til å følgje med og bli engasjert. - Korleis gjennomføre ei lesestund?
Gjennomfør det Bjorvand kallar ei merksam lesing. Ikkje hysj eller send strenge blikk. Be andre vaksne om å delta på same måte som barna slik at det blir ein felles aktivitet for både barn og vaksne som gjer det lettare å ha samtaler med barna om boka i etterkant. Ver merksam på barna. - Korleis avslutte ei lesestund?
Avslutt lesestunda på ein roleg måte som inviterer til meir leselyst. Du kan avslutte med å spørje kva boka har fått barna til å tenkje på, eller spør om barna vil synge ein song som avslutning.
Refleksjon over eigen praksis
- Bjorvand skildrar alle steg i planlegginga av ei høgtlesingsstund. Kva steg kan du ha nytte av å bruke meir tid eller sette meir fokus på når du planlegg eigne lesestunder?
- Korleis kan du førebu barna på det de skal lese?
- Tilsette i barnehage og bibliotek har ulike føresetnader når det gjeld kjennskap til barna. Korleis påverkar det førebuinga til lesestunda? Korleis brukar du det du veit når du planlegg ei lesestund?
- Korleis kan val av bok og/eller kjennskap til barna påverke gjennomføringa av den planlagde lesestunda?