Kom tilbake! Formidlingstiltak for å reaktivere lånarar

Søknad

Rapporter

Andre filressurser

Mål

Vi vil gjere biblioteket vårt kjent for foreldre, unge vaksne og tilflyttarar, gjennom formidling av tenester og tilpassa litteratur. Vi vil legge til rette for at inaktive lånarar igjen skal bli aktive lånarar!
Med utgangspunkt i data og statistikk vil vi sjå om vi i løpet av 2021 vil få fleire aktive lånarar i alderen 20-45. Vi vil også sjå etter auke i utlån til denne aldersgruppa.

Beskrivelse

Kort skissert vil vi lage eit formidlingsopplegg basert på ein presentasjon med tilhøyrande informasjonsvideo. Videoen vil bli laga uavhengig av prosjektet. Til kvart oppdrag vil vi krydre presentasjonen med boktips og høgtlesing tilpassa situasjonen/målgruppa. Vi vil reise rundt på foreldremøte og arrangement for å formidle. Første arrangement er allereie under planlegging. Gjennom prosjektet vil vi kunne sette av tid til å lage eit ferdig formidlingsopplegg som vi kan bruke lenge etter at prosjektperioden er ferdig. Det er satt av eigne midlar til produksjon av video i 2020.
Planlegging og produksjon av video er IKKJE del av søknaden, men vil skje uavhengig av støtte.

Bakgrunn for tiltaket:
Vi ynskjer å gjere sunnfjordingane betre kjent med biblioteket sitt og få dei til å kjenne på leseglede igjen. Etter kommunesamanslåing er vi no seks ulike bibliotek samla under namnet Biblioteka i Sunnfjord kommune og vi må formidle tenestene våre mykje breiare og mykje tydeligare enn før. Vi har gått frå 13 000 innbyggarar til om lag 22 000 og er den nye storkommunen nord i Vestland fylke.

Også vi bibliotektilsette må bli betre kjent med innbyggarane våre, spesielt dei som berre har vage minner om eit bibliotek frå oppveksten, men som no er unge vaksne eller har eigne barn som veks opp i Sunnfjord. Situasjoner der foreldre kjem til biblioteket for å skaffe lånekort til barna sine, er gull verdt. Det er då vi kan ta «bibliotekspraten», informere om biblioteket og oppgradere lånekortet. Det skal ikkje vere flaut eller rart å vende tilbake til barndommens bibliotek. Difor vil ha gode felles rutinar som å slette gamle gebyr og krav, som for mange er eit hinder for å returnere til biblioteket. I tillegg må vi vise fram kor mykje biblioteket har forandra seg og korleis biblioteket er relevant den dag i dag. Då er det viktig med god informasjon om fjernlån, biblioteksappen og digitale tenester som Bookbites, Pressreader og Nasjonalbiblioteket sine tenester. Tilflyttarar frå andre byer og bygder må også bli kjent med sitt nye bibliotek. At nye brukarar skal føle seg heime i det fysiske og digitale biblioteket er ei viktig målsetting for oss og ein naturleg del av formidlingsarbeidet vi nå vil vidareutvikle.

Men vi når ikkje alle i biblioteket, difor må vi ut av biblioteket for å vise fram det vi kan tilby, samstundes som vi formidlar god litteratur. Vi må til dømes prioritere ressursar til å dra på foreldremøte. Kanskje får vi berre 15 minutt, og da må det vere 15 gode minutt som er godt førebudd – og det er bakgrunnen for denne søknaden.

Det manglar nemleg ikkje på bokkunnskap, formidlingsglede, vilje eller etterspørsel. Det vi ofte ser manglar, er tid nok til førebuing. Vi har tilsette med erfaring og kunnskap innan barnelitteratur, munnleg formidling og design/utforming. Vi har kompetanse og ressursar til å utforme eit formidlingsopplegg, men vi har ikkje tid til å lage det eller vise det fram. Om vi kan frikjøpe personal frå skrankearbeid, vil vi få tid til å lage eit ferdig formidlingsopplegg som vi kan ta med oss ut av biblioteket og til dei potensielle brukarane som vi saknar i biblioteket vårt.

Vi opplever også at vi ser unge vaksne (mange av dei studentar) som bruker lesesalen eller dukkar opp på konserter og arrangement, men som ikkje bruker dei andre tenestene våre i like stor grad. Vi kjenner til ungdomsmiljø og kreative miljø (som Sunnfjord Skaparhus og Peak Sunnfjord), som kan bli viktige støttespelarar for oss når vi vil nå nye brukarar. Det å etablere kontakt med desse vil vere del av prosjektet.

Forankring:
Biblioteka i Sunnfjord kommune jobbar etter tiltaksplanen tilhøyrande Sektormål for kultur og idrett i Sunnfjord kommune.
Om formidling og tenesteutvikling står det blant anna:
-Samarbeide med grendalag om «bok i butikk», litteraturarrangement i forsamlingshus eller ved lokale arrangement og festivalar.
-Synleggjering av eininga for innbyggjarane og eigen organisasjon: vi skal vere synlege og til stades for alle innbyggarane i kommunen.
-Vi skal utvikle kjennskap om eigen organisasjon og tilhøva for innbyggarane i heile kommunen innan vår sektor.

Vidareføring:
Biblioteket har stillingsressurs knytt til marknadsføring og formidling, som vil ha hovudansvar for dei målgruppene vi vil satse ekstra på.
Statistikken vil gi oss en god pekepinn på kor vidt vi har lykkast i å få fleire lånarar i aldersgruppa 20-45, og om det framleis er denne eller andre målgrupper vi bør prioritere framover.