Folkebiblioteket i lokalsamfunnet – kvalitet, verdi og potensial

Søknad

Mål

Effektmål
Små og mellomstore kommunar har betre grunnlag for å vurdere og utvikle eiga bibliotekverksemd basert på faktorar i lokalsamfunnet.
Bibliotektenester er betre tilpassa det enkelte lokalsamfunn/kommune.
Norske kommunar har verktøy til å samle, handtere og formidle data om sitt folkebibliotek.
Fylkeskommunane får vidareutvikla si rådgjeving til lokale myndigheiter gjennom å tilby ei heilskapleg og lokalt tilpassa vurdering av folkebibliotektenesta.

Resultatmål
Utvikle metode og gjennomføre analyse av folkebibliotekas samfunnbidrag basert på tidlegare forsking.
Utvikle ei heilskapleg løysning for innsamling, handtering og formidling av data samla inn frå og om norske folkebibliotek
Utvikle metode for å identifisere og samanstille relevante data om kommunar, der biblioteket kan spele ei rolle.
Utvikle og prøve ut modell der ein koplar relevante data om kommunen med bibliotekas ulike samfunnsbidrag for vurdering av kvalitet, verdi og potensial i det enkelte folkebibliotek.

Beskrivelse

Prosjektet «Folkebiblioteket i lokalsamfunnet – kvalitet, verdi og potensial» vil bidra til at lokalsamfunn får betre tilpassa bibliotektenester ved å utforske forholdet mellom det einskilde lokalsamfunnet og folkebiblioteket. I eit samarbeid mellom akademia og praksisfeltet vil vi utvikle metodar for kunnskapsinnhenting, finne fram til praktiske reiskapar for å analysere kva behov biblioteket skal svare på i den enkelte kommune. Dette vil bli sett i samanheng med kva verdi og potensial folkebiblioteket kan ha i eit lokalsamfunn. Gjennom prosjektet vil vi vidareutvikle fylkeskommunen si rådgjeving til lokale myndigheiter ved å utvikle verktøy for å vurdere kvaliteten på bibliotektenesta i små og mellomstore kommunar. Slik kan kommunane utvikle tilbodet i samsvar med utfordringar og moglegheiter i eige lokalsamfunn.

Bakgrunn
Vestland fylkeskommune, fylkesbiblioteka i Innlandet og i Akershus, Buskerud og Østfold ser at kommunane i større grad treng kunnskap om kva folkebiblioteket kan bidra med i lokalsamfunnet. Biblioteket kan vere med på å løyse fleire oppgåver og utfordringar enn det kommunane som eigarar ofte kjenner til. Vi har likevel eit avgrensa og for lite systematisert kunnskapsgrunnlag å tilby kommunane. Dei treng eit betre grunnlag for å kunne prioritere, differensiere og målrette bibliotektilbodet.
I prosjektet vil vi utvikle ein modell for å vurdere og målbere kvalitet, verdi og potensial på folkebibliotektenestene basert på behov og moglegheiter i lokalsamfunnet. Modellen vil kome kommunane til nytte, og vil samstundes styrkje fylkeskommunane si rådgjeving til lokale myndigheiter, jf. lov om folkebibliotek §6. Ferdig utvikla modell er tenkt å kunne nyttast av alle fylkeskommunane i rådgjevingsarbeidet, som kunnskapsgrunnlag for planlegging og prioritering av bibliotektenester i kommunane.
For å utvikle ein modell som har praktisk nytte samstundes som den er basert på aktuell forsking og utviklingsarbeid, vil vi etablere tett samarbeid mellom akademia (OsloMet) og praksisfeltet.
Prosjektet vil ha overføringsverdi i kraft av at modell utvikla i prosjektet vil kunne nyttast til fylkeskommunal rådgjeving i små og mellomstore kommunar over heile landet. Både for kommunane og fylkeskommunane kan modell/metode vere aktuelle i samband med signal om nye krav til planlegging på kulturfeltet som del av kulturlova. Resultat frå prosjektet vil verte aktivt formidla i publikasjonar, på konferansar og på nettsidene til dei deltakande institusjonane.
Søknaden er forankra i Nasjonal bibliotekstrategi 2020-23 og Utvidet nasjonal bibliotekstrategi ut-25, og planar og strategiar i dei tre fylkeskommunane, sjå vedlegg 1.

Skildring av prosjektet
Prosjektet vil bestå av fleire arbeidspakker

Arbeidspakke 1: Utvikle metode for vurdering av kvalitet, verdi og potensial i folkebibliotek
Det vil i prosjektet vere sentralt å definere kva kvalitet, verdi og potensial i folkebibliotek betyr. Vidare vil vi undersøkje kva metodar som er aktuelle basert på erfaringar frå tidlegare prosjekt og forsking. Analysane må kunne femne om ulike dimensjonar ved folkebiblioteket, t.d. som møtestad, demokratisk arena, kulturarena, læringsarena og formidlingsarena.
Vi treng også meir kunnskap om kva verdi eller betydning folkebiblioteket har i form av utbytte for individ og samfunn. Det kan vere oppleving for den enkelte, personleg utvikling, lesekompetanse, informasjonskompetanse og sosial kompetanse i befolkninga, inkludering og tilhøyrsle. Eit sentralt mål i prosjektet er å finne fram til relevante metodar og prosessar for å identifisere kvalitetane ved bibliotekverksemda, basert på tidlegare forsking. Vi er på jakt etter «bibliotekeffekten», samfunnsverdien av folkebibliotek, korleis biblioteka bidreg til livskvalitet, folkehelse og berekraftige lokalsamfunn.
I arbeidspakken vil forskarar frå forskingsgruppa INKULSAM ved OsloMet delta, der fleire har erfaring med forskingsarbeid som prosjektet kan bygge vidare på.

Arbeidspakke 2: Utvikle ei heilskapleg løysing for innsamling, handtering og formidling av data samla inn frå og om norske folkebibliotek.
Vi vil utvikle ein fullt fungerande løysning for innsamling, handtering og formidling av data samla inn frå og om norske folkebibliotek. Det skal utviklast ein digital portal som folkebibliotek enkelt kan kople seg på. Portalen skal gjera det mogleg for eit bibliotek å gå i felt med ei felles brukarundersøking, samle inn svar og samanlikne sine svar med svara frå andre bibliotek.
Denne piloten vil byggje vidare på erfaringar med brukarundersøkingar frå storbybibliotekundersøkinga, Lillestrømbibliotekene si undersøking og Fylkesbiblioteket Akershus, Buskerud og Østfold sitt prosjektsamarbeid med Norsk Publikumsutvikling. Han vil også sjåast i samanheng med utviklinga av applikasjonar og infrastruktur knytt til handtering av trafikkteljingsdata. Målet er å etablere ein brukarvenleg portal som gjer det enkelt for både små og store bibliotek å samle inn, analysere og samanlikne data, og samstundes gje OsloMet og andre tilgang til data for forskingsføremål.
Vi vil gjenbruke spørsmåla i brukarundersøkinga i det pågåande prosjektet til Storbybibliotekene, som tar mål av seg av å bli ei nasjonal undersøking som skal vere relevant for sektoren, uavhengig av storleik, profil og geografisk plassering. Målet er å teste ein infrastruktur som legg til rette for langsiktige og tverrgåande samanlikningar av resultat frå skjema og metodar for brukartesting og modellar for kvalitetssikring.
Ved prosjektslutt vil ein koma med ei tilråding for vidareføring av løysinga, kor portalen bør ligge og om det er ytterlegare behov for utvikling for å tilfredsstilla biblioteka sine behov.
Lillestrømbibliotekene er ansvarleg for gjennomføringa av arbeidspakke 2 i tett samarbeid med OsloMet og Fylkesbiblioteket i Akershus, Buskerud og Østfold. Bakgrunn og detaljar kring arbeidspakken er skildra i vedlegg 8.

Arbeidspakke 3: Utvikle og prøve ut modell der ein koplar relevante data om kommunen med bibliotekas ulike samfunnsbidrag for vurdering av kvalitet, verdi og potensial i det enkelte folkebibliotek.
Vi vil synleggjer dei mange områda der bibliotektenesta kan bidra med verdi i lokalsamfunnet, jf. «bibliotekeffekten» skildra i arbeidspakke 1, og knyte dette saman med informasjonen om dei lokale tilhøve i lokalsamfunnet. Dette vil vi gjere ved å samanstille funna i arbeidspakke 1 om verdi, kvalitet og potensiale i folkebibliotek, brukarundersøking i den einskilde kommune jf. arbeidspakke 2, og anna relevant data om kommunen der biblioteket kan spele ei rolle. Slik vil vi danne ein modell for vurdering og prioritering av bibliotektenesta opp mot utfordingar og moglegheiter i lokalsamfunnet.
Det finst ei rekkje prosjekt og undersøkingar som vil vere del av kunnskapsgrunnlaget i prosjektet saman med aktuell forsking på området. I prosjektet er det òg aktuelt å trekkje inn materiale og kompetanse frå fleire fagmiljø, som Telemarksforsking, Folkehelseinstituttet, SSB, KS m.fl.
Vi vil i utvikling av modellen sjå til andre vurderingsverktøy som er brukte i evaluering av tenester, sjå vedlegg 2-7.
Vi vil i arbeidspakken jobbe saman med OsloMet, i tillegg til utvalde kommunar som vil prøve ut modellen for vurdering av kvalitet, verdi og potensial i folkebibliotek. Kommunane vil ha relevante ulikskapar som kan fungere som variablar. Kommunane vil òg fungere som ei referansegruppe i prosjektet, og bidra i evaluering og forbetring av modellen.