Markér Fosseforedraget med lesesirkel
Markér Fosseforedraget med lesesirkel
Den amerikanske forfattaren Marilynne Robinson er invitert til å halde Fosseforedraget 2026. Dette er eit ypparleg høve til å dykke ned i ei av notidas mest interessante forfattarskap.
Den amerikanske forfattaren Marilynne Robinson er invitert til å halde Fosseforedraget 2026. Samtidig er den nederlandske omsetjaren Paula Stevens vinnar av Fosseprisen for omsetjarar i 2026.
Fosseforedraget og Fosseprisen for omsetjarar er ei heidring av nobelprisvinnar i litteratur Jon Fosse. Hovudarrangementet er foredrag og utdeling på Slottet. I dagane før og etter pågår ei eiga arrangementsrekkje på Nasjonalbiblioteket der du kan bli nærare kjent med Marilynne Robinson og Paula Stevens.
Inspirerande lesesirklar
Som inspirasjon til formidling av Marilynne Robinsons forfattarskap har vi invitert eit knippe av bibliotek rundt om i landet til å halde lesesirkel omkring ei av bøkene hennar.
Kongsberg bibliotek, Trondheim bibliotek, Svalbard bibliotek og Sølvberget bibliotek har alle teke i mot oppfordringa, og er klare for å dykke ned i eit av notidas mest interessante forfattarskap i løpet av våren.
I Kongsberg bibliotek er det ein entusiastisk gjeng som no les Gilead. Som eit ekstra løft for leseopplevinga, får dei besøk av ein ekspertdeltakar, Kaja Schjerven Mollerin, sakprosaforfattar, essayist og litteraturkritikar, på lesesirkelmøtet.
Ein annan norsk Marilynne Robinson ekspert er litteraturprofessor og forfattar Janne Stigen Drangsholt. Ho kjem til lesesirkelen i Stavanger, og vil dele sine perspektiv på forfattarskapen.
I Trondheim vert samtalen leidd av ein erfaren Robinson-tilhengar og bibliotekar, og på Svalbard går dei grundig til verks ved å gå gjennom forfattarskapen over ein serie med møter.
Slik kan fleire bli kjend med Marilynne Robinson
Vi ønsker å inspirere og oppmode andre interesserte bibliotek til å halde lesesirkel og samtale kring forfattarskapen fram mot foredraget og Fosseutdelinga.
Romanane til Robinson er høgt anerkjende og namnet godt kjend i litterære krinsar. Samstundes er ho ein forfattar som kan vere ny for mange, og dette er eit ypparleg høve til å bli betre kjend med henne.
Marilynne Robinson er særleg kjend for den såkalla Gilead-kvartetten. Ho er også vel så kjend for sine essay, er omsett til 36 språk og blir stadig nemnd i samband med nobelprisen i litteratur.
Lesesirkel er eit involverande og godt formidlingstiltak. Ved å velje eit av verka til Robinson er de garantert gode samtalar. Vi oppmodar også alle til å sjå og høyre foredraget og forfattarsamtalen som skal haldast ved Nasjonalbiblioteket i april.
I tillegg til å nærlese romanane hennar, har de no óg sjansen til å verte betre kjend med ein av dei fremste tenkjarane om litteratur, historie, kristendom og humanisme i vår tid.
Robinson er ein tenkjar som utfordrar sjølvbiletet i moderniteten og forsvarar det åndelege i mennesket. Særleg i ei tid der vi, etter hennar syn, har ein tendens til å redusere oss sjølve til det som er målbart – til dømes biologi, politikk eller økonomi. Ho stiller også spørsmål ved den kynismen som pregar samtida, og peikar på at det ligg i menneskenaturen å gjere godt mot kvarandre.
Vi håpar fleire bibliotek vil gripe dette høvet og skape rom for samtale, refleksjon og felles lesing denne våren.
Dersom ditt bibliotek er nye som lesesirkelhaldar, kan du lære meir i denne ressursen om lesesirklar og korleis du kan leggje til rette på biblioteket:
For TIBI-lånarar så er heile Gilead-kvartetten, og andre bøker tilgjengeleg som lydbøker i TIBI-tenesta :
Nasjonalbiblioteket inviterer heile folket til litterære dagar frå 23. til 25. april
Dette er første gong Marilynne Robinson står på ei norsk scene. Paula Stevens har vore i Noreg mange gonger, men som omsetjar har ho oppheldt seg meir bak enn på scena. No får publikum eit eineståande høve til å bli kjent med dei begge.
Nasjonalbiblioteket legg ut billettar til dei som ønsker å delta på nb.no, men i tillegg strøymer vi alle arrangementa som dei halde i våre lokale.
Alle bibliotek har høve til å sende strøyminga vidare til publikum i sine lokale. Særleg anbefaler vi forfattarsamtalen med Robinson den 24. april.
Utdrag av programmet
Forfattersamtale med Marilynne Robinson
Nasjonalbiblioteket sin eigen lesesirkel diskuterer Marilynne Robinsons ferske tekst:
Meir om Fosseforedraget og Fosseprisen