Rom for samtale, læring og leselyst

Søknad

Mål

Naustdal bibliotek skal bli ein framtredande lokal arena for samtale, læring og leselyst gjennom utvikling av eit større og meir funksjonelt lokale, nye arbeidsmåtar og auka samhandling lokalt og regionalt.

Målgruppe
Biblioteket vårt er eit kombinasjonsbibliotek, folkebibliotek og skulebibliotek er samlokalisert. Tenesta er for alle innbyggjarar, men dette samarbeidet gjer barn og unge til den største brukargruppa i biblioteket vårt – og dermed den viktigaste målgruppa for utviklingsarbeidet.

Beskrivelse

Oppgåve
Naustdal kommunestyre vedtok i mars 2012 «Kommunedelplan for kultur 2012-2015». Planen seier at Naustdal kommune skal: «utvikle biblioteket til ein framtredande lokal kulturarena med fokus på fleirbruksfunksjonar». Arbeidet skal sjåast i samanheng med anna utviklingsarbeid og byggeprosjekt i kommunen.

Naustdal bibliotek ynskjer å vekkje leseglede og leselyst hos barn, ungdom og vaksne og har eit mangfald for store og små av kunnskap og oppleving.

I samband med utviding og ombygging av Naustdal barne- og ungdomsskule får biblioteket ei ny og meir sentral plassering i skulen. Vi vil sikre at vi får maksimal effekt av den nye situasjonen, og nytte høve til å utvikle bibliotekrommet og bibliotektenesta i tråd med målsettinga i biblioteklova.

Samanheng
Gjennom å vekke undring vil Naustdal kommune skape endring. Kunstnaren Kjartan Slettemark og Vevringutstillinga inspirerer oss, og samtidskunst er ei viktig drivkraft i alt utviklingsarbeid i kommunen vår.
Hovudmålet i «Kommunedelplan for kultur 2015-2017» er at alle i Naustdal kommune skal ha tilgang til sosiale aktivitetar og kultur- og fritidstilbod.

Barn og unge er Naustdal sin største ressurs for framtida, og kommunen har tverrfagleg fokus på godt oppvekstmiljø. Over fleire år har vi sikra eit stabilt tilbod i ungdomsklubben og arbeider målretta for betre læringsmiljø, mobbeførebygging og tidleg hjelp til barn i risiko. Vidare er barn og unge hovudmålgruppe for arbeidet med samtidskunst, både som utøvarar og publikum. Vi ser på korleis skule, barnehage og frivillige organisasjonar kan arbeide saman for å sikre trygt lokalsamfunn og gode rollemodellar både i skule- og fritid.

I 2014 er vi godt i gang med rehabilitering og utviding av to viktige kvardagsarenaer og samfunnsinstitusjonar, Naustdal barne- og ungdomsskule (NBU) og Lunden barnehage.
Med Kjartan Slettemark sitt verk Kjartanistan som rammeverk, samarbeider vi med arkitekt Bjørn-Are Vollstad om å gjere kunst til ein meir aktiv del av kvardagen. Vi vil gjere viktige kvardagsarenaer som skule og barnehage til leikande kunstlandskap, og invitere til innleving og medskaping i eige samfunn / liv.

Naustdal bibliotek er del av «Biblioteka i Indre Sunnfjord», eit regionalt samarbeid med biblioteka i Gaular, Jølster, Førde og Fylkesbiblioteket i Sogn og Fjordane. Biblioteka samarbeider for å gje brukarane best mogleg tilbod, oghar felles mediebase, transportordning og felles tiltak/arrangement (t.d. forfattarbesøk og Sommarles).
I prosjektet «Saman for framtida» har biblioteka og Fylkesbiblioteket sett på korleis samarbeidet i regionen kan styrkast ytterlegare, og nye løysingar både i drift og aktivitet er prøvd ut og etablert. Prosjektet har mottatt tilskot frå Nasjonalbiblioteket.

Utfordringar
Naustdal bibliotek er ein møtestad og ein kunnskapsallmenning. Gjennom samlokalisering av folkebibliotek og skulebibliotek er biblioteket ein sentral i læringsarbeidet i skulen, god tilgang for elevar og tilsette vert sikra, tenesta er lett tilgjengeleg for publikum (skulen ligg i sentrum av kommunen), og vi har god utnytting av dei økonomiske ressursane til biblioteka.

Vi ser likevel behov for å vurdere funksjonane i biblioteket, regionalt og lokalt samarbeid, arbeidsmåtar og tiltak. Vi vil styrke biblioteket, og utvikle det til ein framtredande lokal kulturarena. Vi har behov for rom som er tilpassa samfunnsoppdraget, lokalsamfunnet og dei ulike behova brukarane har.

Hovudaktivitet
1. Kreativitet i samfunnsutviklinga, lokalt og regionalt samarbeid –
Biblioteket vårt er sentralt i lokalsamfunnet, og skal vere arena for ulike møte og opplevingar knytt til litteratur og litteraturformidling, tradisjon, kultur og lokalhistorisk arbeid.
Gjennom utvikling av eksisterande tenester vil vi betre tilbodet brukarane får hjå oss. Utviklingsarbeidet skal laupande takast inn i det dagelege arbeidet i biblioteket slik at resultatet frå prosjektet kan nyttast fullt ut når prosjektet er avslutta.

I dialog med brukarane og samarbeidspartnarar skal vi vurdere arbeidsmåtar og tiltak
– Kva er biblioteket si rolle? Kva skal biblioteket vårt vere, kva behov i kommunen skal vi vere med å løyse og korleis kan vi utvikle tenesta for å svare på dette?
– Kan rom eller delar av arealet nyttast på ulike måtar i ulike samanhengar? Fleirbruksfunksjonar.
– Kan nye tilbod etablerast, realtert til utviklingsarbeid i kommunen eller frivillig arbeid?

2. Utvida areal –
Forprosjektet viser til arealnorma for folkebibliotek og skildrar behov for utviding av arealet til Naustdal bibliotek med minimum 100 kvm
Det nye biblioteklokalet er sentralt og luftig, men lite i høve til arealnorm for folkebibliotek. Styringsgruppa for utbygginga sikra i september 2014 ei utviding av biblioteket på 50 kvm, men for å sikre ei god bibliotekteneste for om lag 3000 innbyggjarar er eit samla areal på 345 kvadratmeter framleis knapt. Magasin, kontor, entré og toalett er inkludert i dette arealet, og skulebiblioteket sine funksjonar skal også løysast på ein god måte.

Utviding av arealet er viktig for å
– sikre universell utforming – rørsle soner m.m NS 11001-1
– styrke tilbodet til barn og unge / skulebiblioteket
– ha plass til grupper. Slik skulebygget er disponert i dag, nyttar også biblioteket tilstøytande elevkantine for ulike arrangement. Ved ombygging har ein ikkje slike areal i tilknyting til bibliotek.
– kunne tilby ulike former for formidling – ord/bilete/lyd – i «eventyrrommet».
– ha rom til møter og ulikt teknisk/digitalt utstyr. Arealet kan kombinerast med plassering av lærarbibliotek, lokalsamling og studieplassar. Rommet kan også nyttast ved ulike møte/temaarrangement.

3. Funksjonalitet i det fysiske rom –
Disponering av areal og plassering av funksjonar påverkar publikum si oppleving og deira bruk av biblioteket. Gjennom betre funksjonalitet i bibliotekrommet vil vi betre tenestene til brukarane.

Kvalitetssikra planløysing og innreiing er viktig for at
– alle brukargrupper skal ha tilgang til biblioteket – universell utforming.
– delar av arealet skal bli særskilt tilrettelagt for barn og unge.
– dei ulike drifts-funksjonane skal løysast på ein god måte, og opne for samhandling med publikum.

4. Kunnskapsoverføring, formidling av erfaringar
Biblioteka i Indre Sunnfjord har regelmessige møte der det vert naturleg å drøfte problemstillingar, informere og involvere kollegaer i løpet av prosessen. Samspelet vil gje meirverdi i prosjektet og samstundes tilføre verdi utover det lokale.
Vi vil dokumentere prosess og resultat i tekst og bilete, og formidle dette i både trykte og digitale medium.

Resultat
Prosjektet «Rom for samtale, læring og leselyst» er viktig lokalt, det skal skape engasjement, byggje samhald (infrastruktur for samspel) og setje varige spor i form av tilførte element og tilbod i lokalsamfunnet.
Med eit større og meir funksjonelt lokale vil vi komme lokalsamfunnet i møte ved å gje dei ein arena for aktivitet, og vi vil kunne vidareutvikle samarbeidet vi har med blant andre husflidslag, sogelag og mållag i dag. Forfattarkveldar, lesesirklar og kurs i slektsgransking, skriving, handarbeid er noko av potensialet vi ser.

Vidare vil Utviklinga av bibliotekrommet og -tenesta vil skje i samspel med anna utviklingsarbeid i kommunen, og byggje vidare på det regionale samarbeidet og prosjektet «Saman for framtida».