Digital debatt

Type:Utviklingsmidler
Prosjekteier:Vestland fylkesbibliotek
Prosjektkategori:Innsatsområder: Biblioteket som møteplass
Samlet støtte:250 000
Antall tildelingsår:1-årig
Status:Avsluttet
Tidsperiode:2014, 2015, 2016

Søknad

Mål

Vidareutvikle biblioteka som debattarena, kunnskapsallmenning og møteplass ved å leggje til rette for debatt og deling av arrangement på biblioteknettstadene.

Beskrivelse

«Debatten startar og held fram på din lokale biblioteknettstad»
I prosjektet skal ein utvikle eit digitalt debattforum for biblioteknettstader som byggjer opp under funksjonen biblioteka har som debattarena og møteplass. Forumet vil invitere brukarane til å debattere også i det digitale bibliotekrommet. Tenesta skal kunne delast enkelt på biblioteknettstader i heile landet med open programvare. Alle som har lånekort skal kunne logge seg inn og delta i debattar.

Bakgrunn
Gjennom prosjektet Biblioteklandskap i endring har regionale biblioteksamarbeid i Hordaland fått felles biblioteknettstader utvikla i eit samarbeid med fylkesbiblioteket. Nettstadene er utvikla i den fri programvaren Drupal. Våren 2014 blir www.hardangerbiblioteka.no og www.sunnbib.no utvikla vidare med responsiv design, og www.biblioteka.ivest.no blir lagt om til ein ny nettstad med vekt på formidling. Nettstadene er biblioteka sine digitale samlingspunkt for både innbyggjarar og bibliotektilsette i regionane, og gode utgangspunkt for å vidareutvikle meir produksjon og deling av innhald og tenester.

Digital debatt vil vere 100% integrert mot Drupal 7. For andre system blir det lagt til rette for å integrere tenesta via API`er eller «I-frame». 

Deling og debatt på biblioteknettstadene
I samband med alle arrangement ein har i biblioteka der ein ønskjer å opne for debatt mellom deltakarane, skal det leggjast til rette for i det digitale forumet. Debattane kan gjerne starte i forkant av arrangementet, for å profilere og skape engasjement bland moglege deltakarar. Ein kan også invitere til dialog med innleiarar. Gjennom prosjektet «Sterk og spenstig» skal ein prøve ut streaming av arrangement på biblioteknettstadene. For dei arrangementa som blir streama, skal debatten vere synleg i samanheng med streaminga.
Ved at arrangement også blir digitale, kan dei som ikkje kan vere fysisk til stades både følgje det og vere med på debattane. Dette er spesielt aktuelt i regionar med lange avstandar mellom kommunane. Debattforumet kan knyte saman dei fysiske og digitale bibliotekromma og gjere arrangementa større og meir levande. Digital debatt kan også styrke innbyggjarane si tilhøyre til sin lokale biblioteknettstad.

Debatt til aktiv formidling
Gjennom å utvikle ei eiga teneste for digitale debattar i bibliotek, i staden for å nytte sosiale media og liknande, kan vi integrere tema for debattar med andre tenester biblioteka tilbyr på nettstadene, som media, artiklar, anbefalingar og lenker, og nytte debattane aktivt til formidling. I samband med debattane skal kvart bibliotek kunne liste ut kva for bøker osb. dei har om temaet/ forfattaren på arrangementet.
Debattane skal styrast av ein moderator. Ansvaret for å vere moderator kan gå på omgang i biblioteka. Debattar skal opnast og lukkast i tråd med moderatoransvaret og høve til å følgje debattane opp.

Opplæring
I prosjektet skal det lagast eit enkelt e-læringsopplegg for å ta tenesta i bruk, som bibliotektilsette kan bruke for å setje i gong med digitale debattar.

«Vi møtast på biblioteket»
Kring litteraturarrangement kan ein opne for at deltakarane dannar digitale lesesirklar som kan leve vidare i etterkant, etter inspirasjon frå det svenske www.bokcirklar.se.

I prosjektet skal Digital debatt prøvast ut på dei tre regionale samarbeidsnettstadene hardangerbiblioteka.no, sunnbib.no og biblioteka.ivest.no.
Gjennom Digital debatt blir brukarane invitert inn på biblioteknettstadene for å debattere og kommentere. Bibliotektilsette startar ein debatt ved å produsere eit opplegg som kan vere sett saman av tekst, bilder og film. Debatten kan gå føre seg på tvers av biblioteknettstader.
Dei einskilde biblioteka kan anten opprette sitt eiga debattopplegg eller laste ned opplegg som er produsert av andre bibliotek, frå den sentrale tenesta. Ved å laste ned andre sine debattar og gjere synleg på eigen nettstad, får brukarane av nettstaden tilgang til å lese og debattere med. På denne måten blir det fleire brukarar, jo fleire bibliotek som blir med på prosjektet og nyttar debattar på sine nettstader.

Prosjektet vil ha stor overføringsverdi for andre, og verdien av debattane vil auke jo fleire bibliotek som tar i bruk tenesta.

Samarbeid med Inlead
Prosjektideen er utvikla i eit samarbeid med det danske webfirmaet Inlead. Inlead leverer open programvare software løysingar og konsulenttenester innan digital kommunikasjon, primært til biblioteksektoren i Norden. Dei har spesielt arbeidd med danske folkebibliotek sidan 2005, og levert tenester som erolen.dk, emusik.dk, netlydbog.dk og Danskernes Digitale Bibliotek.